చెన్నై లవ్ స్టోరీ మూవీ రివ్యూ

ఆర్టిస్ట్స్ : కిరణ్ అబ్బవరం, శ్రీ గౌరిప్రియ, త్రిగుణ్, నవీన్, సిరి హనుమంతు తదితరులు
ఎడిటర్ : సంతోష్ నాయుడు
సంగీతం : మణిశర్మ
సినిమాటోగ్రఫీ : విశ్వాస్ డేనియల్
నిర్మాతలు : ఎస్.కే.ఎన్, సాయి రాజేష్
కథ : సాయి రాజేష్
స్క్రీన్ ప్లే, డైరెక్షన్ : రవి నంబూరి

బేబీ మూవీ తర్వాత ఎస్కేఎన్, సాయి రాజేష్ బాండింగ్ మరింత స్ట్రాంగ్ గా ఉంది. ఈ ఇద్దరూ కలిసి ఓ సినిమా చేస్తున్నారు అంటే అదో ‘కల్ట్, క్లాసిక్’అని ఆ ఇద్దరూ ముందుగా ఫిక్స్ అయిపోతుంటారు. అలా ఫిక్స్ అయి చేసిన సినిమానే చెన్నై లవ్ స్టోరీ. కిరణ్ అబ్బవరం, శ్రీ గౌరిప్రియ జంటగా నటించిన ఈ మూవీ ప్రమోషన్స్ తో మాత్రం బాగా ఆకట్టుకున్నారు. అయితే దర్శకుడి గురించి మాత్రం ప్రమోషన్స్ లో పెద్దగా పట్టించుకోలేదు. అందుకు కారణాలేంటో కానీ అన్ని ప్రమోషన్స్ లో ఎస్కేఎన్, సాయి రాజేష్ మాత్రమే కనిపించారు. మరి ఈ మూవీ ఇవాళ(24.07.2026)విడుదలైంది. మరి చెన్నై లవ్ స్టోరీ ఎలా ఉంది అనేది చూద్దాం.

కథ :

అజయ్(త్రిగుణ్)నివేదిత(శ్రీ గౌరీ ప్రియ) మూడేళ్లుగా ప్రేమించుకుంటారు. ఇద్దరూ పెళ్లికి సిద్ధం అవుతారు. తీరా పెళ్లి రోజు అజయ్ తను మరో అమ్మాయిని ఇష్టపడుతున్నా అని తప్పుకున్నాడు. అంత గాఢమైన ప్రేమ ఇలా పెటాకులు కావడంతో నివి చెన్నైలోనే ఉద్యోగం చేసుకుంటూ మందుకు బానిస అవుతుంది. మందు తాగేందుకు తన ఫ్రెండ్స్ తో కలిసే ఉంటుంది. ఈ టైమ్ లో ఆ ఫ్రెండ్స్ గ్యాంగ్ కు స్టీఫెన్ శంకర్(కిరణ్ అబ్బవరం) వారికి పరిచయం అవుతాడు. అతనో అనాథ. స్టీఫెన్ ఓ సినిమా దర్శకుడు కావాలని ప్రయత్నం చేస్తుంటాడు. ఆ క్రమంలో వీరి ఫ్రెండ్స్ తో కలిసి రూమ్ షేరింగ్ కు వస్తాడు. అందరితో కలివిడిగా ఉండే స్టీఫెన్ నివిని బాగు చేయాలని ప్రయత్నం చేస్తుంటాడు. మొదట కసురుకున్నా నివి స్టీఫెన్ ను చేరదీస్తుంది. అతని సినిమా ప్రయత్నాల్లో అండగా ఉంటుంది. అలాగే ఆమె తన ప్రేమను మర్చిపోలేకపోతుంటుంది.
స్టీఫెన్ ఆమెను బాగా మోటివేట్ చేస్తాడు. తొలిప్రేమ పోయినా మలి ప్రేమలోనూ మరో ఆనందం వెదకాలి అని చెబుతుంటాడు. ఈ క్రమంలో మెల్లగా నివి మందు మానేస్తుంది. ఓ టైమ్ లో ఆమె స్టీఫెన్ ను పెళ్లి చేసుకుందాం అని చెబుతుంది. మొదట షాక్ అయిన స్టీఫెన్ తర్వాత హ్యాపీగా ఒప్పుకుంటాడు. నివి పేరెంట్స్ కూడా ఓకే చెప్పడంతో పెళ్లికి సిద్ధం అవుతారు. కట్ చేస్తే మళ్లీ నివి పెళ్లి రోజే మరో షాకింగ్ విషయం తెలుస్తుంది. మరి అదేంటీ..? ఇద్దరి మధ్య బంధం చెడుతుందా లేక ఇంకేదైనా జరుగుతుందా..? నివి లైఫ్ లో మళ్లీ అజయ్ వస్తాడా అనేది మిగతా కథ.

ఎలా ఉంది..?

చెన్నై లవ్ స్టోరీ.. ఓ సాధారణమైన కథ. కానీ కథనంతో చాలాసార్లు మెప్పిస్తుంది. కాకపోతే ఈ కథలోని షాకింగ్ పాయింట్ అందరికీ కనెక్ట్ అవుతుందా లేదా అనేది తెలియదు.ఆ పాయింట్ కొంత వరకు ఫర్వాలేదు అనిపిస్తుంది. కానీ ఓ దశ దాటిన తర్వాత అది మరీ బోరింగ్ కనిపిస్తుంది. బట్ చెన్నై లవ్ స్టోరీ రెగ్యులర్ స్టోరీలాగానే మొదలవుతుందీ మూవీ. లవ్ లో ఫెయిల్ అయిన అమ్మాయి మందుకు బానిస కావడం కొత్తగా ఉంది. తర్వాత కిరణ్ అబ్బవరం ఎంట్రీతో సినిమా జోష్ గా కనిపిస్తుంది. కానీ అదే పనిగా అతనికి సంబంధించిన సీన్స్ రిపీటెడ్ గా ఉండటం కాస్త ఇబ్బంది కరం.
ఓ అస్పైరింగ్ ఫిల్మ్ మేకర్ గా కనిపించినా కిరణ్ అబ్బవరంకు గౌరీ ప్రియ చెప్పే వరకు అసలు విషయం అర్థం కాకపోవడం కనెక్టింగ్ గా లేదు. అలాగే ఆమె తన ప్రేమను మర్చిపోవడానికి మందు మొదలు పెట్టి తర్వాత కిరణ్ అబ్బవరంతో కనెక్ట్ అయ్యాక చాలా తక్కువ టైమ్ లోనే మరో ప్రేమకు సిద్ధం కావడం కన్విన్సింగ్ గా లేదు. పోనీ పాత ప్రేమికుడిపై కోపమా అంటే.. అదేం కాదు. కేవలం ఓ పది రోజుల్లోనే మరో ‘గొప్ప’ ప్రేమికుడికి కనెక్ట్ కావడం సినిమాటిక్ గా కూడా అస్సలు బాలేదు. పోనీ ఈ ఇద్దరి మధ్య అద్భుతమైన ప్రేమకథకు సంబంధించిన సన్నివేశాలు ఉన్నాయా అంటే అవి కూడా బలంగా లేవు. హృదయాల్ని కదలించే సన్నివేశాలు, మనసులను మెలిపెట్టే సీన్స్ ఉన్నాయా అంటే అదీ అస్సలు లేదు.
ఇక సెకండ్ హాఫ్ ఎలా మొదలుపెడతారా అని ఎదురుచూసిన వారికి ఇది కాస్త బానే ఉన్నట్టుగా కనిపిస్తుంది. ఈ ఇద్దరి మధ్య అప్పుడు మంచి ప్రేమ ఉంటుందా అదీ లేదు. అక్కడ కూడా హీరో అబ్సెషన్ కనిపిస్తోంది. ఈ క్రమంలో వచ్చే కొన్ని సన్నివేశాలు నవ్వులు పూయిస్తుంది. అలాగే గౌరీప్రియ లైఫ్ లోకి అతని మాజీ ప్రియుడు ఎంటర్ కావడం.. అతను మరో అమ్మాయితో పెళ్లి చేసుకుంటాడు అనుకున్నా అది కుదరడం లేదు అని చెప్పడంతో ఆమెకు అతనిపై కొంత సాఫ్ట్ కార్నర్ ఉంటుంది. అయితే శ్రీ గౌరీప్రియపై జరిగిన లైంగిక దాడి ప్రయత్నంలో ఆమెకు అప్పటి వరకు పట్టిన మబ్బులు విడిపోయినట్టుగా ఆమె ప్రవర్తన, నటన కనిపిస్తుంది. అయినా అతనిపై అంతులేని ప్రేమ ఉన్నట్టు చెప్పడం.. అతని కోసం జీవితాంతం ఉండిపోతాను అనడం ఆ టైమ్ కు సూట్ కాలేదు.
ఇక అప్పటి వరకు తను చాలా గొప్ప ప్రేమలో ఉన్నాడు అన్న భావనలో ఉన్న కిరణ్ అబ్బవరంకు అసలు విషయం అర్థం అవుతుంది. తర్వాతే సరైన నిర్ణయం తీసుకున్నాడు అనిపిస్తాడు. కట్ చేస్తే కథ కాస్త బాధాంతంగా ముగుస్తుంది.
కిరణ్ అబ్బవరం, శ్రీ గౌరిప్రియకు మధ్య అంత గొప్ప ప్రేమ ఎలివేట్ కావడానికి కావాల్సిన సన్నివేశాలు లేకపోవడం.. అసలు చాలా తక్కువ టైమ్ లోనే వీరిది ఓ అమర ప్రేమగా బిల్డప్ ఇవ్వడం అస్సలు సూట్ కాని కథనం. ఇదో బిగ్గెస్ట్ మైనస్ గా కనిపిస్తుంది. ఓ రకంగా అజయ్ పాత్రలో కాస్త హుందాతనం ఉంది. అదీ ప్లస్ పాయింట్ గా ఉంది మూవీలో. ఏదేమైనా ఇదో సాధారణమైన కథ. ఆ మూవీకి ఇంకాస్త బలమైన కథనం కూడా ఉంటే ఇంకా బావుండేది. కాకపోతే చూస్తున్నంత సేపు మాత్రం సినిమా కంప్లీట్ గా పాసబుల్ గా ఉంటుంది. ఇది మూవీకి ప్రధాన బలంగా ఉంటుంది. అంతే కానీ వీళ్లు చెప్పినట్టుగా ఇదో ఎపిక్, కల్ట్ లాంటి పదాలకు చాలా అంటే చాలా దూరంగా ఉందీ మూవీ. ఇవి తెచ్చిపెట్టుకున్న పదాలే తప్ప అసలు ఆ పదాలకు స్పష్టమైన మీనింగ్ కూడా తెలియని వాళ్లు ఆ పదాలతో మూవీని రుద్దడం ఏ మాత్రం నిజాయితీ లేని వారే చేసే పని.

నటన పరంగా

కిరణ్ అబ్బవరం తన పాత్రలో సహజంగా నటించాడు. ఆ పాత్రలోని వైవిధ్యాన్ని ప్రదర్శించే అవకాశం వాడుకున్నాడు. శ్రీ గౌరిప్రియ పాత్ర చాలా బావుంది. తనూ చాలా గొప్పగా నటించింది. కాకపోతే ఆ పాత్రలు చాలా తొందరగా ప్రేమలో పడటం పెద్ద మైనస్. ఆ ప్రేమకూ బలమైన పునాది కూడా లేదు. అజయ్ పాత్రలో త్రిగుణ్ బాగా చేశాడు. అతని ఫేస్ లో వయసు మీద పడిన ఛాయలు స్పష్టంగా కనిపిస్తున్నాయి. ఇతర పాత్రలన్నీ వెరీ రొటీన్.

టెక్నికల్ గా

ఈ మూవీకి ప్రధాన బలం మణిశర్మ సంగీతం. అద్భుతమైన పాటలు, గొప్పగా అనిపించే నేపథ్య సంగీతంతో తనదైన మ్యాజిక్ ను మరోసారి క్రియేట్ చేశాడు. సినిమాటోగ్రఫీ చాలా చాలా బావుంది. ఎడిటింగ్ పరంగా చాలా డ్రా బ్యాక్స్ ఉన్నాయి. డైలాగ్స్ బానే ఉన్నాయి. ప్రొడక్షన్ వాల్యూస్ బావున్నాయి. దర్శకుడు ఎవరు అనే కన్ఫ్యూజన్ కొనసాగుతూనే ఉంది. బట్ టైటిల్ లో చెప్పిన దాన్ని బట్టి రవి నంబూరి బాగా చేసే ప్రయత్నం చేశాడు. అతని మేకింగ్, టేకింగ్ బావున్నాయి. కథనం విషయంలో బలమైన కసరత్తులు చేయాల్సి ఉంది.

ఫైనల్ గా : ట్విస్ట్ తో సాగే రొటీన్ లవ్ స్టోరీ
రేటింగ్ : 2.5/5
– K.Y.R