బాలీవుడ్ బ్యూటీలకు టాలీవుడ్‌పై భయం మొదలైందా..?

ఒకప్పుడు టాలీవుడ్ స్టార్ హీరో సినిమా అంటే బాలీవుడ్ హీరోయిన్లు కూడా ఆసక్తిగా ఎదురుచూసేవారు. పాన్ ఇండియా మార్కెట్, భారీ క్రేజ్, దేశవ్యాప్తంగా గుర్తింపు… ఇవన్నీ ఒకే సినిమాతో వస్తాయని చాలామంది భావించేవారు. కానీ గత కొంతకాలంగా పరిస్థితి కొద్దిగా మారుతోందనే చర్చ ఇండస్ట్రీలో వినిపిస్తోంది. కొంతమంది పేరున్న ఆర్టిస్ట్ లను తెలుగు దర్శకులు సరిగా వినియోగించుకోవడం లేదు అనేది ప్రధాన కారణంగా కనిపిస్తోంది. దీంతో పాటు కేవలం స్టార్ హీరోల చుట్టూ మాత్రమే కథలన్నీ తీసుుకోవడం, రాసుకోవడం కూడా ఓ పెద్ద మైనస్ గా ఉంది. ఇది ఇలాగే కొనసాగితే కేవలం హీరోల చుట్టూ మాత్రమే అల్లుకున్న కథలన్నీ అవుట్ డేటెడ్ అవుతాయి అనేది నిజం.

దానికి ప్రధాన కారణంగా జాన్వీ కపూర్ పేరు ఎక్కువగా వినిపిస్తోంది. వరుసగా రెండు తెలుగు పెద్ద సినిమాల్లో నటించినప్పటికీ, ఆమె పాత్రలపై వచ్చిన విమర్శలు ఇప్పుడు టాలీవుడ్ దర్శకుల కథా నిర్మాణంపైనే ప్రశ్నలు లేవనెత్తుతున్నాయి. అయితే ఇది మొత్తం టాలీవుడ్ గురించిన తీర్పు కాదు. కొంతమంది దర్శకులు హీరోయిన్లకు అద్భుతమైన పాత్రలు రాస్తుండగా, మరికొన్ని కమర్షియల్ సినిమాల్లో మాత్రం హీరోయిన్ పాత్రలు కథలో అంతగా నిలబడటం లేదనే అభిప్రాయం ప్రేక్షకుల్లో పెరుగుతోంది.

‘దేవర’తో మొదలైన చర్చ

జాన్వీ కపూర్ తెలుగు తెరకు పరిచయమైన సినిమా దేవర. ఈ సినిమాతో ఆమెపై భారీ అంచనాలు ఏర్పడ్డాయి. శ్రీదేవి కూతురిగా తెలుగు ప్రేక్షకుల్లో ఉన్న అనుబంధం కూడా ఆ అంచనాలను మరింత పెంచింది. అయితే సినిమా విడుదలైన తర్వాత ఎక్కువమంది ప్రేక్షకులు చెప్పిన కామన్ పాయింట్ ఒక్కటే. జాన్వీ కపూర్ పాత్రకు కథలో చాలా తక్కువ ప్రాధాన్యత ఉందని. స్క్రీన్ టైమ్ కూడా పరిమితంగానే ఉండటంతో ఆమె నటనను చూపించే అవకాశాలు పెద్దగా కనిపించలేదని విమర్శలు వచ్చాయి. ఈ అంశాన్ని అప్పట్లో పలు సినీ విశ్లేషకులు కూడా ప్రస్తావించారు.

‘పెద్ది’తో వివాదం మరింత పెరిగింది

‘దేవర’ తర్వాత బుచ్చిబాబు దర్శకత్వంలో వచ్చిన పెద్దిపై మాత్రం పరిస్థితి మరింత భిన్నంగా మారింది. ఈ సినిమాలో జాన్వీ కపూర్ పాత్రను ఎలా చిత్రీకరించారనే అంశంపై సోషల్ మీడియాలో పెద్ద ఎత్తున చర్చ జరిగింది. ముఖ్యంగా కెమెరా యాంగిల్స్, రొమాంటిక్ సన్నివేశాలు, హీరోయిన్ ప్రజెంటేషన్‌పై ప్రేక్షకులు తీవ్ర విమర్శలు చేశారు. మహిళా పాత్రను కథకు అవసరమైన స్థాయిలో కాకుండా విజువల్ గ్లామర్‌కే పరిమితం చేశారని పలువురు అభిప్రాయపడ్డారు. ఈ వివాదం బాగా పెరగడంతో దర్శకుడు బుచ్చిబాబు స్పందిస్తూ కొన్ని సన్నివేశాలను మార్చామని, ఎవరికైనా అసౌకర్యం కలిగితే క్షమించాలని కూడా చెప్పారు.

ఇది ఒక్క జాన్వీ సమస్యేనా..?

ఇక్కడ ఒక విషయం గుర్తుంచుకోవాలి. జాన్వీ కపూర్ టాలీవుడ్ సినిమాలు చేయనని ఎక్కడా ప్రకటించలేదు. అలాగే “తెలుగు సినిమాలకు దూరంగా ఉంటాను” అని కూడా ఆమె అధికారికంగా చెప్పలేదు. అలాంటి వార్తలకు ఇప్పటివరకు ఎలాంటి అధికారిక ఆధారాలు లేవు. అయితే తన పాత్రలపై వచ్చిన విమర్శల తర్వాత మహిళా పాత్రల ప్రజెంటేషన్ గురించి ఆమె స్వయంగా స్పందించింది. సినిమా సెట్స్‌లో నటీమణులు కూడా తమ అభిప్రాయం చెప్పగలగాలి అని పేర్కొంది. అందుకే “బాలీవుడ్ హీరోయిన్లు ఇప్పుడు తెలుగు సినిమాలకు భయపడుతున్నారు” అని చెప్పడం కంటే, “మంచి పాత్రలు ఉంటేనే స్టార్ హీరోయిన్లు ఆసక్తి చూపుతారు” అనడం వాస్తవానికి దగ్గరగా ఉంటుంది.

దర్శకులు ఆలోచించాల్సిన విషయం ఇదే

ఇప్పటి ప్రేక్షకులు కేవలం హీరో ఎలివేషన్ మాత్రమే చూడటం లేదు. హీరోయిన్ పాత్ర కూడా కథలో భాగంగా ఉండాలని కోరుకుంటున్నారు. అందుకే ఇటీవల కాలంలో బలమైన మహిళా పాత్రలు ఉన్న సినిమాలకు మంచి ఆదరణ కూడా లభిస్తోంది. హీరోయిన్‌ను కేవలం పాటల కోసం లేదా గ్లామర్ కోసం ఉపయోగించే ట్రెండ్‌పై సోషల్ మీడియాలో కూడా విమర్శలు పెరుగుతున్నాయి. అంటే కమర్షియల్ సినిమా చేయకూడదనే కాదు. కానీ కథలో హీరోయిన్‌కు కూడా గుర్తుండిపోయే పాత్ర ఉంటే సినిమా స్థాయి మరో మెట్టు ఎక్కుతుంది.

టాలీవుడ్‌కు ఇది హెచ్చరిక కాదు… అవకాశం

టాలీవుడ్ ఇప్పుడు పాన్ ఇండియా స్థాయిలో నిలిచింది. దేశం మొత్తం తెలుగు సినిమాల వైపు చూస్తోంది. అలాంటి సమయంలో హీరోలతో పాటు హీరోయిన్ల పాత్రలకూ సమానమైన ప్రాధాన్యత ఇస్తే మరింత మంచి గుర్తింపు వస్తుంది. దర్శకుల క్రియేటివిటీని ప్రశ్నించడం కాదు… ప్రేక్షకుల అభిరుచి మారుతోందనే విషయాన్ని గుర్తించడం ముఖ్యం.జాన్వీ కపూర్ చుట్టూ మొదలైన ఈ చర్చ భవిష్యత్తులో మరిన్ని బలమైన మహిళా పాత్రలకు దారి తీస్తే… అదే టాలీవుడ్‌కు నిజమైన విజయం అవుతుంది.