అక్కడెవరో నిద్రపోయారని నానా యాగీ చేస్తున్నావ్
నువ్వేదో మెలకువలో ఉన్నట్టు..
ఎవడో వచ్చి ప్రశ్నించడం లేదని నానా ప్రశ్నలూ గుప్పిస్తున్నావు
వినడాన్ని మించి ఇంకేం చేయగలవు.. ?
ఎవడో వస్తాడని .. ఎన్నాళ్లైనా కానీ
ఎదురుచూస్తూనే ఉంటావు
నీ సమస్యపై ఎవడో ప్రశ్నిస్తే కానీ
పౌరుషం గుర్తుకురాని గులామ్ గిరీగానివా నువ్వు
హామీలిస్తే చాలు.. హాయిగా ఉంటాననే భ్రమల్లో తేలిపోతావు
అమలు ఎలా అని ఆలోచించవెందుకు
బతుకంటేనే పోరాటం..
అది ఆపేసి
వాడి ప్రశ్నల కోసం
వాడి బాసుల కటాక్షం కోసం కాచుకుంటావెందుకు..?
కళ్లుమూసుకుని ప్రపంచాన్ని చూస్తున్నవాడివి
నీకు కన్నెర్రజేసే హక్కుందంటావా..?
ఆలోచించుకో.. నువ్వేం చేయాలో..
ఆలోచించుకో .. నువ్వేం చేయగలవో..
ఆలోచనలు పంచుకో .. నువ్వేం చేయగలననుకుంటున్నావో ..
గొర్రెలమందకు నేర్పాల్సింది
తలవంచుకు వెళ్లిపోవడం కాదు..
తలఎత్తుకుని ఆలోచించడం
ఆ మందకు చూపాల్సింది
గరికపచ్చ మైదానాలను కాదు
కీకారణ్యం కౄరమృగాలను
ఎందుకంటే గొర్రెలూ తిరగబడతాయ్..
నేడో రేపో ఎల్లుండో..
ఆలస్యమైనా ఫర్వాలేదు..
అదనుచూసి వేట మొదలుపెట్టాలి
అందుకే ఎదురుచూపులు మాని
ఎదుర్కోవడం నేర్చుకో..?