జగపతిబాబు, శ్రీకాంత్ లకు ఇంకా అవకాశాలున్నాయా

• Yaswanthrao Rao
• July 15, 2026

తెలుగులో ఒకప్పుడు టైర్ 1 హీరోలు, టైర్ 2 హీరోలు, టైర్ 3 హీరోలు అంటూ ఉండేవారు. వారందరికీ సరైన మార్కెట్ కూడా ఉండేది. ఆయా హీరోలకు మంచి రిలీజ్ లు దొరికేవి. కంటెంట్ ఉంటే టికెట్స్ కూడా భారీగా తెగేవి. కానీ ఇప్పుడు సిట్యుయేషన్ మారింది. ఇలాంటి హీరోలకు మంచి అవకాశాలు రావడం లేదు. ఆ మాటకొస్తే సినిమాలు చేస్తున్నారు కానీ కొనేవాళ్లు కూడా బాగా తగ్గిపోయారు. అందుకే ఒకప్పుడు మంచి ఫామ్ లో ఉన్న జగపతి బాబు, శ్రీకాంత్ లాంటి హీరోలు ఇతర పాత్రల వైపు మళ్లిపోయారు. విలన్ గా అయినా క్యారెక్టర్ ఆర్టిస్ట్ లకు మరో ఇన్నింగ్స్ మొదలు పెట్టారు. ఈ టైమ్ లో అంతా హ్యాపీ అనుకుంటోన్న టైమ్ లో సడెన్ గా మళ్లీ వీళ్లకు హీరో దోమ కుట్టినట్టు ఉంది. హీరోలుగా మళ్లీ కొత్త సినిమాలతో రాబోతున్నారు. అది కూడా ఇద్దరూ ఒకే రోజు విడుదలతో వస్తున్నారు. విశేషం ఏంటంటే ఈ రెండు సినిమాల్లో కూడా హీరోయిన్ లయ. ఇది కాస్త ఆశ్చర్యమే అయినా అసలు వీళ్లకు మళ్లీ సత్తా చాటే అవకాశాలున్నాయా అనేదే అసలు ప్రశ్న. ఈ ప్రశ్నకు సమాధానం దొరకాలంటే ఈ నెల 17న తెలుస్తుంది.
జగపతి బాబు హీరోగా నటించిన మూవీ వదలా. తమ్మారెడ్డి భరద్వాజ నిర్మించిన సినిమా ఇది. వయసు మళ్లిన ఓ వ్యక్తికి జీవితంలో ఓ యువతి తారసపడుతుంది. అతన్నే ప్రేమిస్తున్నా అంటూ అతని కుటుంబానికి దూరం చేస్తుంది. అయితే ఈ యువతి పాత్రతో కొత్తమ్మాయి పరిచయం అవుతోంది. తనది నెగెటివ్ రోల్ అంటూ ప్రమోషన్స్ లో చెబుతోంది. ట్రైలర్ అయితే బావుంది. ఈ తరహా పాత్రలకు జగపతిబాబు పాత ఇమేజ్ కు సరిపోయేలా ఉంది. అయితే ఒకే పాయింట్ తో అంత సేపు ఆడియన్స్ చూడగలరా అనేది పెద్ద పాయింట్. అదీ కాక అసలు ఈ జెనరేషన్ ఆడియన్స్ కు ఈ మూవీ కనెక్ట్ అవుతుందా అనేది మరో పెద్ద విషయం. నిజానికి ఇప్పుడు ఫ్యామిలీ ఆడియన్స్ థియేటర్స్ కు రావడం లేదు. ఈ టైమ్ లో ఒకప్పటి ఫ్యామిలీ హీరో అనే ఇమేజ్ ఉన్న జగ్గూ భాయ్ కి మళ్లీ ఆ ఆడియన్స్ ను తీసుకు వచ్చే కెపాసిటీ ఉందా అంటే లేదు అనే చెప్పాల్సి వస్తుంది.
ఇక శ్రీకాంత్ పరిస్థితి కూడా ఇంటు మించు ఇలాగే ఉంది. హీరోగా అతనూ ఎప్పుడో ఫేడవుట్ అయిపోయాడు. జగపతిబాబు లాగానే ఇతర పాత్రలకు ఎప్పుడో మారిపోయాడు. ఇలాంటి టైమ్ లో అతను మిస్టర్ మిడిల్ క్లాస్ అనే మూవీతో రాబోతున్నాడు. రాజేంద్ర ప్రసాద్ బ్రహ్మదేవుడు పాత్రలో కనిపించబోతున్నాడు ఈ మూవీలో. విశేషంగా ఈ ట్రైలర్ కూడా బావుంది. ఓ మిడిల్ క్లాస్ జనానికి కనెక్ట్ అయ్యే కథగా కనిపిస్తోంది. అతనికి ఉన్న సమస్యలను దేవుడే తీర్చేలా ఉండేలా ఉన్నా అతను అతను దేవుడు అనే విషయంలో అతనికి తెలియదు. ఈ క్రమంలో వచ్చే వినోదాత్మకమైన కథనం కూడా ఉండేలా ఉంది. ఇదీ సేమ్. ఇప్పుడు శ్రీకాంత్ కు ఆడియన్స్ ను తీసుకువచ్చే సత్తా ఉందా అంటే లేదు అనే చెప్పాలి. మిస్టర్ మిడిల్ క్లాస్ టైటిల్ బావుంది. ఈ టైటిల్ కు తగ్గ కథ కూడా సెట్ అయినట్టుగా ఉంది. మరి ఏ మేరకు జనం మెచ్చుతారు అనేది కూడా పెద్ద ప్రశ్నే.
ఏదేమైనా ఈ ఇద్దరు హీరోలకు బాగా సెట్ అయ్యే కథలే ఇవి. కాకపోతే ఆడియన్స్ కు ఈ మూవీస్ కనెక్ట్ అవుతాయా.. అదీ ముఖ్యంగా ఈ తరం ప్రేక్షకులకు. ఒకవేళ రివ్యూస్ అవీ బావుంటే అప్పుడు థియేటర్స్ కు వస్తారేమో కానీ ఈ లోగా వీకెండ్ పూర్తవుతుంది. తర్వాత వీరి పరిస్థితి ఏంటీ అనేది తెలియాల్సి ఉంది. ఏదేమైనా ఈ గత తరం హీరోలిద్దరూ ఒకే రోజు మళ్లీ హీరోలుగా వస్తుండటం మాత్రం కాస్త మంచి పరిణామమే. ఎటొచ్చీ ఈ చిత్రాలు కూడా ఆకట్టుకోవాలి. అప్పుడే మరిన్ని కథలు వస్తాయి. లేదంటే వీటితో ఆగిపోవాల్సిందే ఇంక.