రవితేజ హీరోగా నటించిన ఇరుముడి మూవీ రివ్యూ

• kalyan5023@gmail.com
• August 21, 2026

ఇరుముడి మూవీ రివ్యూ

ఆర్టిస్ట్స్ : రవితేజ, ప్రియా భవానీ శంకర్, సాయి కుమార్, బేబీ నక్షత్ర, శ్వాసిక, రమేష్ ఇందిర, అజయ్ ఘోష్ తదితరులు
ఎడిటర్ : ప్రవీణ్ పూడి
సంగీతం : జి.వి. ప్రకాష్ కుమార్
సినిమాటోగ్రఫీ : విష్ణు శర్మ
నిర్మాతలు : రవి ఎర్నేని, వై.వి. రవి శంకర్
దర్శకత్వం : శివ నిర్వాణ

రిలీజ్ డేట్ : 21.08.2026

మాస్ మహరాజ్ రవితేజ మూవీస్ ఈ మధ్య వరుసగా పోతున్నాయి. రవితేజకు హిట్ పడి చాలాకాలం అయింది. ఈ టైమ్ లో వచ్చిన మూవీ ఇరుముడి. ఈ మూవీపై ముందు నుంచి పాజిటివ్ బజ్ ఉంది. టీజర్, ట్రైలర్ బాగా ఉన్నాయి అనే టాక్ వచ్చింది. పాటలూ ఆకట్టుకున్నాయి. అయినా రవితేజ మూవీ కాబట్టి ఏదో అనుమానం ఉన్నట్టుగా చాలామంది భావించారు. శివ నిర్వాణ డైరెక్ట్ చేసిన ఇరుముడి మూవీ ఎలా ఉంది అనేది ఈ రివ్యూలో చూద్దాం.

కథ :

త్రినాథ రావు(రవితేజ) ఓ సాధారణమైన ఆటో డ్రైవర్. అతని భార్య కావేరి(ప్రియా భవానీ) కూతురు మణికంట అలియాస్ మణెమ్మ (బేబీ నక్షత్ర) తో హ్యాపీ లైఫ్ గడిపేస్తుంటాడు. అయితే అతనికి విపరీతంగా మందు తాగే అలవాటు ఉంటుంది. అయినా అయ్యప్ప మాల వేసిన రోజులన్నీ నిష్టగా ఉంటాడు. త్రినాథ్ కు కూతురే జీవితం. త్రినాథ్ కు ఊరంటే కూడా చాలా ఇష్టం. అక్కడ ఎలాంటి చెడు ఉందని తెలిసినా వెంటనే రియాక్ట్ అవుతుంటాడు. అలా రియాక్ట్ అవ్వాలని కూతురే చెబుతుంటుంది. అదే టైమ్ లో మణెమ్మ పుష్పవతి అవుతుంది. అదే టైమ్ లో త్రినాథ్ మాలలో ఉంటాడు. కొన్ని రోజుల వరకూ కూతురును చూడకూడని చెబుతారు. అసలే కూతురు లేకుండా నిద్రపోని త్రినాథ్ కు ఈ ఎడబాటు బాధగా ఉన్నా.. ఓర్చుకుంటాడు. ఇక అదే ఊరిలో ఉండే గోపరాజు (సాయికుమార్) గురుస్వామిగా ఉంటాడు. అతనికీ టెంత్ క్లాస్ చదివే కూతురు ఉంటుంది. ఆ కూతురు అనుకోని ఇబ్బందుల్లో పడిపోతుంది. ఆ విషయం తెలిసిన మణెమ్మ తన తండ్రికి చెప్పాలని ప్రయత్నిస్తుంటుంది. కానీ కుదరదు. అలాంటి టైమ్ లో అనుకోకుండా మణెమ్మ చనిపోతుంది. ఇది ఓ పెద్ద షాక్. మరి ఆ మరణం వెనక ఉన్న వాస్తవాలు ఏంటీ..? గురుస్వామి కూతురు ఎలాంటి సమస్యల్లో ఉంది..? అలాగే ఆ ప్రాంతం ఎమ్మెల్యే మంచితనం వెనక ఉన్న కారణాలు ఏంటీ అనేది మిగతా కథ.

ఎలా ఉంది :

కొన్ని కథలు ఇలాగే ఉంటాయి అని ముందు అనుకుంటాం.. కానీ సినిమా చూస్తే కానీ అందులో బలమైన కంటెంట్ ఉన్నట్టుగా అర్థం అవుతుంది. ఇరుముడి కూడా ఇలాగే ఉంటుంది. ఓ గొప్ప సందేశాన్ని మిళితం చేస్తూ ఓ సాధారణమైన వ్యక్తి జీవితంలో జరిగిన అనేక పరిణామాల చుట్టూ అల్లుకున్న కథ ఇది. ఓ ఆటో డ్రైవర్.. రెండెకరాల పొలం ఉంటుంది. ఓ చిన్న కుటుంబం. ఎవరికి సమస్య వచ్చినా.. ఎవరివల్ల సమస్య వచ్చిన వెంటనే ఆదుకునే సాధారణమైన మనిషిగా రవితేజ కనిపిస్తాడు. రవితేజ తాగుతాడు అనే కంప్లైంట్ తప్ప భార్య కూడా చాలా మంచిదే. ఇక అతని కూతురు పాత్రను రాసుకున్న విధానం మాత్రం ఎక్స్ ట్రార్డినరీ అనే చెప్పాలి. ఆ పాప నటన మరో స్థాయిలో కనిపిస్తుంది. తండ్రి, కూతుళ్ల మధ్య బలమైన బంధం. ఆ బంధం చుట్టూ అల్లుకున్న అద్భుతమైన సన్నివేశాలు.. ఇవన్నీ హైలెట్ గా ఉంటాయి.

అయ్యప్ప మాల ధారణ గురించి ఏదో క్యాజువల్ గా చెప్పడం కాకుండా బలమైన కథనంతో మెప్పించాడు దర్శకుడు. ఫస్ట్ హాఫ్ అంతా మాస్ అండ్ యాక్షన్ తో బాగా ఆకట్టుకున్నాడు రవితేజ. సాధారణమైన కథలాగే కనిపిస్తుంది మొదటి సగం. రెండో సగంలోనే ఈ కథలో ఇంకేదో బలమైన కంటెంట్ ఉందని అర్థం అవుతుంది. అదేంటీ అనేది సినిమా చూస్తే కానీ తెలియదు. సినిమా చూడాలి కాబట్టి దీని గురించి ఎక్కువగా చెప్పలేం. బట్ ఈ పాయింట్ ను ముందు డైజెస్ట్ చేసుకోవడం కష్టంగా ఉంటుంది. కానీ అందులో వాస్తవం ఉంది. చాలామందికి తెలియని ఈ ఫాంటసీ కోణం గురించి చాలామందికి అర్థం కావాలి. అలా అర్థం అయితే కూతుళ్ల విషయంలో తల్లి తండ్రులు ఎంత జాగ్రత్తగా ఉండాలి అనేది తెలుస్తుంది.

ఇక రవితేజ కూతురు చనిపోయిన దగ్గర నుంచి కథనం మొత్తం బరువెక్కుతుంది. ఓ రకంగా ఈ మూవీ క్లైమాక్స్ చూస్తే ఏడవని వారు అంటూ ఉండరు. అంత భావోద్వేగంతో సాగుతుంది క్లైమాక్స్. ఎంత కఠినులైనా సరే.. ఈ మూవీ క్లైమాక్స్ చూసి కన్నీళ్లు పెట్టకుండా ఉండలేరు. అది రైటింగ్ లో ఉన్న గొప్పదనం. ఏదేమైనా ఇలాంటి బలమైన సందేశం కూడా మిక్స్ అయిన కమర్షియల్ మూవీ అంటే ఈ మధ్య కాలంలో రాలేదు అనే చెప్పాలి.

మూవీలో మైనస్ లు లేవా అంటే ఉన్నాయి. చాలానే ఉన్నాయి. స్క్రీన్ ప్లే బలంగా లేదు. ఇన్ని హత్యలు జరిగినా ఒక్క పోలీస్ పాత్ర కూడా ఉండడు. ఇది ఓ ఏజెన్సీ ఏరియా.. అయినా ఇదేమీ పాత కాలం కాదు. ఈ కాలంలోనిదే. అందరి చేతిలో మొబైల్ ఫోన్ ఉంటుంది. కానీ ఆ హత్యల వెనక పోలీస్ అంటూ ఎందుకు ఉండరో అనేది దర్శకుడికే తెలియాలి. కొన్ని పాత్రలను ఇరికించినట్టుగా ఉంటుంది. మరికొన్ని పాత్రలు అవసరం లేదు అని కూడా అనిపిస్తుంది. బట్ ఇన్ని మైనస్ లను దాటేస్తూ.. ప్రీ క్లైమాక్స్ నుంచి బలమైన సందేశం, అత్యంత బలమైన ఎమోషన్ కూడా ఉంది. అందుకే ఈ మైనస్ ను పాస్ చేసేయొచ్చు అనిపిస్తుంది.

రవితేజ నటన గురించి

నటన పరంగా చూస్తే రవితేజ ఇంత సెటిల్డ్ గా కనిపించడం చాలా కాలం తర్వాత చూస్తున్నాం. ఎక్కడ కూడా మాస్ మహరాజా ఇమేజ్ ఇక్క సన్నివేశంలో కనిపించకుండా కేవలం త్రినాథ్ గా మాత్రమే కనిపించాడు. అద్భుతంగా నటించాడు. ప్రీ క్లైమాక్స్ లో మరీ అద్భుతం. బేబీ నక్షత్ర రవితేజను డామినేట్ చేసినంత పనిచేసింది. గొప్పగా నటించింది. తను మళయాలీ అయినా తెలుగులోనే డబ్బింగ్ చెప్పడం బావుంది. ప్రియా భవానీ శంకర్ కూడా బాగా నటించింది. సాయికుమార్, రమేష్ ఇందిరల పాత్రలు సర్ ప్రైజ్ చేస్తాయి. వారూ గొప్పగా నటించారు. ఇతర పాత్రలన్నీ, అందరూ బాగా చేశారు.

టెక్నికల్ గా :

జివి ప్రకాష్ కుమార్ పాటలు బానే ఉన్నాయి. నేపథ్య సంగీతం ఏమంత గొప్పగా లేదు. సాధారణంగానే అనిపిస్తుంది. సినిమాటోగ్రఫీ చాలా బావుంది. ఎడిటింగ్ పరంగానూ చాలా చోట్ల మైనస్ మార్కులే పడతాయి. కాస్ట్యూమ్స్ చాలా బావున్నాయి. డైలాగ్స్ కూడా బావున్నాయి. మైత్రీ వాళ్ల మూవీ అంటే ప్రొడక్షన్ వాల్యూస్ గురించి కొత్తగా చెప్పాల్సిందేముంటుంది.
దర్శకుడుగా శివ నిర్వాణకు గొప్ప మార్కులు వేయలేము. బట్ ఉన్నంత వరకు బాగానే రాశాడు.. తీశాడు. బట్ ఈ మూవీ ఇంకా చాలా బాగా తీసే అవకాశాలున్నాయి. ముఖ్యంగా స్క్రీన్ ప్లే వీక్ గా ఉండటం పెద్ద లోపంగా ఉంది. అయినా ఓకే.

ఫైనల్ గా : రవితేజకు సూపర్ హిట్ గ్యారెంటీ
రేటింగ్ : 3/5

K.Y.R